Daut weea em scheenen Farjoha 2001. Etj weea aus Gaust bie Thiesses en eene mennische Kolonie en Brasilien. Em Chaco saje se, daut dee Menniste dort em ütstoawe send. Eenmol, wiels see väle aufwaundre sene, no dee Grootstäda, oda uck nom Ütlaund. Toom Biespell no Caunada, daut mennische Paradies hia opp Eaden. En uck, wiels see sich emma mea unja daut latinsche ooda nationale Voltj mische, so daut dee leewste plautdietsche Sproak en daut von Sibirien en de Ukraine metjeschlappte Oafgoot ­ so aus Borschtsch, Lewaworscht oda Repspea - en Jefoha send, veloare to gohne.

Bie Thiesses weare noch een poa Pannasch enjedunge. See kaume üt eene aundre Kolonie von Paraguay auls etj. En so aus daut eenmol es, wann Menniste von hia en dort, von ditsied en jantsied tooptraffe, dann woat spezeat, daut dee Spautze oppem Dack daut schewietre vejeiht. Maun räd äwa aullet meajelje. Dee Chaqueños rede vom Wada, daut ploagt je eant aus de Lies dem Hund oppem Fall. De oostparaguajsche Warteletasch (?) bekloage sich, daut dee Wirtschaft ewahaupt nicht deit, en daut eene gaunze Siedlung nich mea Weit en Soja oppe Been brinjt aus noch ver weinje Joahre een eensja velüsda Büa. Dee brasiliaunsche Sestre en Breeda maltje, daut dee Holländasch eahre Idasch meist opschlappe, en halpe deit daut so vel aus nuscht, saje see, wiels de Pries mang dem Silo lidje blift, en de Real vom Wind veblost woat.

Oba wann se eascht aula toop send, dann woat boold ewa dee Vewaundschaft jeplüdat, so aus wann in latinscha Redna een spaunendet Footbaulspell äwa Radio nosajt.

Auls dan tweschen dem Jubiläumstrubbel Thiesses, Pannasch en etj mol eene Üleflucht Ruh funge, weare dee Benja boolt aum Enj jefot, en maun zoddad en oakad aum Knoppe romm, ohne to weete, woa daut hangohne wurd. Uck Uruguaya mengde sich doa too en spezeade voll mang. Met eenst sajt Fru Panna: „Jo. Mien Schwiavoda, dem storf siene Fru uck mol, en mien Maun, dem fried etj mie, auls hee tjeene Mutta haud. Nu haft'a wada eene, en etj hab `ne Schwieama." Daut en mennischa Wittwa friet, es je nich onbekaunt, oba dise weare aul beid meist en bet ewaällat, noch ütte rusche Revolution.

„Gaunz interessaunt", meend Thiesche, „en wea send de Lied?"

„Schwieavoda es oole Tjnals Panna, en siene nieje Leewste es Tientje Rampel üt dem Chaco." „Dü meenst," fong Derksche üt Uruguay aun, „dü meenst dee Hendrik Rampelsche, dee Plüda-Tientje von Kroonsfeld?" „Jo, dee meen etj, tjanst dü dee vleicht uck noch en Uruguay?"

Nü wea uck Thiesse nieschierig jeworde. `Daut kaun je noch interessaunt rommkome' docht hee opp Stelles. Uck dee aundre Manna haude eahre Wirtschaftsjespräche rütjeschowe. Dee Frües weare je mol wada opp'em rachten Wach, waut nieet toop to dreihe. Daut kunn maun nicht vepausse.

„Daut es miene Mame eahre Nicht -Steefnicht. See woss mol bie dise Femilje opp, aus Rampels daut so sea knaup jintj enne Aunsiedlung em Chaco", ertjlead Derksche en strohld.

„Jo, en soo send wie vewaunt ­ gaunz dicht bie segoa ­ en wie weete daut aulla nicht." Omtje Panna haud sitj bott nü weinig interesseat aun dise Bekaundarie, oba nü stund hee opp, rejt dee nie entdajte Frindschaft dee Haund, kloppad den en bet oppe Schulla en sed wieda nuscht.

Uck Thiesse en Derkse haude dee gaunze Tiet dee Leppe toopjedreiht. See wisste: Bie soone earnste Jesprächsrund durf tjeen Maun to Woat kome, daut wea je aul emma bie dee Menniste Fruessach. Oba nü floach Panna daut doch ewa dee Leppe: „Jo, jo. Vewaunt send wie Menniste aula, en wann jie noch lang jenoach romräde een seatje, send dee schwoate Gloowensbreeda en -sestre üt Afrika uck boold noch onse leibliche Breeda en Sestre."

Zurück zum Inhaltsverzeichnis
Weiter zum nächsten Block: Buchbesprechungen